MAP Hetan Vizita Cortezia Hosi Membru PN Komisaun D

Estrela inativaEstrela inativaEstrela inativaEstrela inativaEstrela inativa
 

Fotografia/Reno/INFO-MAP

Díli-Ministériu Agríkultura no Peskas (MAP), hetan vizita cortezia hosi komisaun D Parlamentu Nasionál (PN) Assuntu Ekonomia no Dezenvolvimentu, objetivu atu haree no rona direitamente ezekusaun orsamentu tinan  2020 ne’ebé maka  liu tiha ona inklui  planu no programa MAP nian iha  tinan 2021.

Iha vizita ne’e simu ofisialmente hosi  Ministru Agríkultura no Peskas, Pedro dos Reis, no iha sorumutu ne’e mós Diretora jerál Agríkultura,  Maria Odete do Céu aprezenta kona-ba orsamentu ne’ebé maka MAP iha ba tinan 2021 nian, Sorumutu ne’e hala’o iha loron Kinta (04/02)  iha Salaun MAP Comoro.

Tuir Ministru (MAP) Pedro dos Reis katak, vizita hosi komisaun D ne’e hodi haree rasik kondisaun real ne’ebé maka Ministériu  enfrenta. Tanba Komisaun D maka trata assuntu ekonomia no dezenvolvimentu, tanba ne’e sira presiza mai haree direitamente atu nune’e ba futuru bele hadia  diak liu tan.

”Ami mós kontenti tebes ho vizita ida ne’e, tanba bele haree direta ami nia kondisaun ne’ebé mak ami enfrenta iha Ministériu ida ne’e, tanba ne’e ami hakarak ba oin kontinua haree hamutuk servisu MAP nian.” Tenik Pedro

Fotografia/Reno/INFO-MAP

Iha sorin seluk,  Prezidente Komisaun D, Antóninho Bianco hatutan katak, objetivu husi vizita de traballu ne’e hodi haree kondisaun real ne’ebé (MAP) enfrenta, no espasu servisu ne’ebé  Ministériu no nia funsionáriu sira iha  durante ne’e haknaar-an bá.

“Hau haree edifisiu ida ne’e eransa tempu Indonesia nian uluk naran Balai Informasaun Pertanian ou ita bele dehan sentru Informasaun agríkola, tanba edifisiu ne’e hadia kedas iha tempu Indonésia ne’e mak sira uza to agora, tanba  espasu  balu dodok ona balu a’at ona neduniba oin  presiza hadia”. Akresenta representante komisaun D

 Antóninho Bianco hatutan,  MAP ne’e Ministériu ne’ebé maka bo’ot hodi  tau matan ba area barak hanesan peskas, floresta, karantina no sasan lubuk ida, tanba ne’e mak ho observasaun ida ne’e komisaun D husu atu guvernu ida ne’e  ba oin tenta buka hodi halo konstrúsaun  ba edifisiu foun ona atu nune’e hodi fó espasu ba funsionáriu sira bele servisu ho diak. Tanba programa no planu ministériu nian tinan ida ne’e  barak  neduni ita hein katak tinan ida ne’e ministériu bele ezekuta ho diak.

Hafoin remata sorumutu Ministru ho nia ekipa akompaiña  Membru PN Komisaun D hala’o vizita ba kada Diresaun iha Resinto MAP nian, hafoin liu kedas ba Diresaun nasionál  Karantina no  Floreta Kaikoli.(Fyna)

 

Parseiru ho

© 2023 Ministeriu Agrikultura no Peskas. All Rights Reserved. Designed by IT MAP

Search

Login