Bobonaro-Ministériu Agrikultura Pekuaria, Peskas e Floresta hamutk ho parseiru dezenvolvimentu JICA, kolleta hare Lokál hamutuk étare 1 ba epoka daruak nian ne’ebe maka utiliza makina Drum Seeder no Sistema kari liña iha natar Eskola Kampu Agrikultura Maliana 1 Hodi bele hasa’e produtividade produsaun haré iha Suku Odomau.
Hafoin remata kollete Ministru MAPPF Eng. Marcos da Cruz esplika, Atividade kolleta haré ne’e ba epoka daruak nian iha irigasaun Maliana 1, iha ne’e agrikultór sira halo natar kuaze atus ida iha area ida ne’e, Total natar iha Irigasaun Maliana 1 hamutuk 1050 ektare (rihun ida limanulu).
Iha epoka dahuluk agrikultór sira halo natar hotu maibe iha epoka daruak nian ne’e agrikultór sira halo de’it kuaze éktare atus ida resin tanba menus be’e no agrikultór balun mós karik sira nia haré sei iha, entaun sira hakarak kuda fali buat seluk hanesan kuda modo, kuda batar no buat sira seluk tan.
“fó hanoin ba Agrikultór sira iha fatin ida ne’e no terotoriu timor tomak katak, ita tenki produs hahan halo natar, la’os de’it iha Maliana maibé iha fatin sira ne’ebé maka potensial ba natar, husu atu agrikultór sira tenki servisu ho MAPPF, Autoridade lokál no mós setór Privadu sira ne’ebé maka sosa produtu agrikola hanesan haré, iha Maliana hanesan Koperativu Cakup Koperativu LANAMONA no mós CLN presiza servisu hamutuk ho komponente sira ne’e atu bele haré produsaun haré ne’e d’iak liu tan iha Futuru.” Tenik Eng Marcos, iha loron Quinta (19/10/23)
Iha fatin hanesan, Representive JICA iha Timor-Leste, Hayakawa Yuta hateten, “Fos rai iha Maliana liu-liu ba iha kualidade fos rai ne’e kualidade di’ak no famozu mós iha Dili, tanba ne’e presiza mantein nia kualidade iha futuru no bele kobre to munisipiu seluk nune’e ema hotu bele konsumu fos rai maliana nian.
neduni Peritus sira husi nasaun Japaun konsege tranfere ona sira nia matenek no mós aprende hamutuk liu-liu iha tekniku produsaun no oinsa liga ba merkadu.
Neduni iha programa ida ne’e ita servisu hamutuk ho Ministériu Administrasaun Estatal (MAE)no mós Ministeriu Edukasaun oinsa atu bele promove fós rai lokál iha Programa merenda escolar. Tanba ida ne’e mós parte ida kontribui ba iha seguransa Ai-han iha Timor-Leste.
Nune’e mós kordenador Estensionista Suku Raifun, Casimiro Lopes esplika, Prosesu hirak ne’e hotu la ses husi programa Pratika Agrikultura Di’ak (PAD) husi MAPPF rasik, durante ne’e kuda haré liña uja makina Drum seeder no tau iha box ne’ebé maka prepara ona foin kari liña. Éktare ida presija fini 60kg.
Atividade ne’e hetan apoiu maximu husi Parseiru dezenvolvimentu JICA, no partisipante ba seromnia Koileta haré ne’e, Partisipa maximu husi Ministru MAPPF Eng. Marcos da Cruz ho komitiva, Tekniku husi Agrikultura Munisipiu, Autoridade Lokál, Komunidade iha suku refere no hetan seguransa husi Parte PNTL Munisipiu Bobonaro. (Tyfa)
